韓國行之奇遇 (2)

繼上集和尚篇後, 仲有一個唔知係咪自己攞黎的奇遇......

喺第4日 (9月15日), 下午時導遊話可以跟benny去大學路飲咖啡, 但可跟可唔跟, 唔跟的團友會喺弘大地鐵站落車, 因為黎咗咁多日, 都未去過權權的cafe飲野, 但自己玩開果堆就唔去住, 淨係想跟benny飲野, 於是我問咗d同團但唔熟的團友去唔去明洞, 大家有個照應, 咁有人話去, 咁要有幾個添, 於是膽粗粗跟住佢地搭地鐵...... (當時已經係下午4點, 而benny當晚有個特別節目, 就係去德誠女子大學睇KBS錄影"Dream Team", 要喺6:30pm喺酒店集合

而我已經問咗K小姐喺邊個車站落, 佢教我搭2號線喺"乙支路三街"落, 好近明洞, 而且唔使我轉黎轉去咁辛苦, 行完明洞後又可以搭番2號線喺"三成洞"落車 (因為近co-ex)

其中一個團友, 我叫她做"爆炸頭", 另一個團友, 我叫她做"S朋友", 第三個團友, 我叫她做"男仔頭".

我問爆炸頭去過明洞未, 佢話去過幾次, 都算熟路, (我地成班人以為爆炸頭同男仔頭係friend, 點知原來係去到先識), 咁我問男仔頭啦, 佢話都去過, 咁諗住冇死啦......

於是我地去到弘大站就落車, 一行人落去地鐵站買飛, 之後男仔頭去買飛 (total有7個人), 咁我地買飛時, 我同爆炸頭先知男仔頭加埋S朋友一干人等係去龍山食野同睇電器, 我同爆炸頭問H朋友: 乜你唔係同我地一齊去明洞咩, 幾時話要去龍山架??? 點知S朋友死口唔認, 一味話冇講過, 仲話可能佢講野有誤會喎.......好, 咁算......

當時男仔頭問地鐵個東昇攞地鐵地圖, 好彩我又攞咗一份有中文的, 否則餘下行程我係冇可能行到嘅......

我地成班人搭2號線, 當男仔頭同S朋友及其他人喺唔知邊個站落車轉車去龍山時, 我同爆炸頭就搭到去"乙支路三街", 準備行番上去過明洞......

但原來爆炸頭冇喺過"乙支路三街"落過車, 只試過喺明洞, 於是2個人頭岳岳, 又搵唔到人黎問, 之後發現有個出口係地下街, 咁試下睇下行唔行得番出去明洞啦......

點知呢條地下街唔同明洞果條, 成條街靜英英, D人多數都係阿豬媽, 阿質斯多, 我地2個都覺得越行越唔對辦, 後來仲發現條地下街可以行去下一個站"乙支路四街", 之後我地就行番轉頭, 呢個時候, 爆炸頭開始有D埋怨, 係咁問我:"究竟邊個教你喺"乙支路三街"落車架, 乜可以行到去明洞咩???" 我都唔知架, 人地咁教我應該冇錯架......

後來行番去"乙支路三街"個站, 之後爆炸頭先話: "其實就算去到明洞, 我帶完你去權權間舖後, 大家就各有各行架啦下......" 我心諗: "吓???" 不過諗住到時先算啦.......

之後爆炸頭研究地鐵地圖, 我地就轉搭3號線落"忠武路", 再諗住轉4號線落明洞, 途中遇到個東昇, 我地問佢咁搭啱唔啱, 個東昇話啱 (仲識講英文添, 樣又唔差), 於是就喺忠武路等地鐵, 但等咗好耐都未有車, 人就越黎越多, 果時都已經5pm啦!

其時爆炸頭可能唔想我跟住佢, 就話:"不如咁啦, 而家都5點咯, 去到明洞都好晏架啦, 不如我同你搭到去東大門, 再轉的士返酒店啦, 時間又慳番d, 而且的士錢又唔會好貴嘅......" 我當時覺得"有冇攪錯呀, 叫我搭的士?!" 於是我話:"咁你呢? 你行到幾點?" 點知佢話: "我諗住行完明洞再行東大門睇衫, 果度越夜越平架, 行到1, 2am先返酒店囉!" 我當堂打個突!!!

加上K小姐同我講過, 喺明洞or乙支路三街搭地鐵返三成洞, 要成十幾個站, 時間要成45分鐘, 所以最後我同爆炸頭講話我唔落明洞, 自己搭番地鐵算啦, 咁爆炸頭又冇留我 (緊係啦, 又唔識我, 仲要帶住我咩???) 佢最後話:"唔好意思教錯你添......" (但當時地鐵都未到忠武路站, 咁我係咪唔走唔得吖......)

後來我自己一個人行番上月台搭番3號線落"乙支路三街", 之後再搭番2號線去返co-ex (三成洞站), 因為我唔知韓國係咪同香港一樣, 轉車都可以用同一張飛, 於是我走去問個妹妹, 但佢好似唔係好識英文, 後來再講耐d佢先明, 妹妹話可以用同一張飛, 地鐵黎到就上咗車啦......

沿途有成十幾個站, 途中見到漢江 (初時靠估, 後來果條真係漢江), 當時已經黃昏啦, 個漢江好靚, 但我當時驚遲返co-ex, 而且又一個人, 所以最後都冇影到! 而且坐到咁上下, 有個傻仔喺度行黎行去, 又企喺我面前望住我, 我咪望番佢囉!!!

到三成洞時出站, 之後去拍咭啦, 但過唔到閘, 可能呢個站好旺, 有個地鐵阿質斯主動走黎幫我睇張飛, 後來先知原來欠200won, 入咗錢後就過得啦!

因為我本身冇酒店地圖, 只有鎖匙咭, 之後又見到另一個地鐵爺爺, 於是攞住張鎖匙咭問佢點去酒店, 佢好好人, 用英文答番我, 仲驚我唔明, 重覆咗幾次兼做埋手勢教我, 我都有道謝佢!!!

去到co-ex的地下商場時, 見到有information, 又走去問個妹妹點行番去酒店, 佢又再教我點行, 於是用咗15分鐘時間行咗地下商場穿過酒店, 當時已經係6pm啦......之後上房抖下, 然後落番去大堂集合去睇"Dream Team"......

後來先知, 原來其他團友喺去大學路會合benny飲咖啡時, 喺車度都塞咗好耐, 最後飲唔成咖啡, 喺條街度行喎......