大物

【中  文  名】：《大物》
【出        品】： SBS電視台
【首        播】： 2010年10月6日(每周三、四播出)
【導        演】： 吳鐘錄 
【編        劇】： 柳東潤
【集        數】： 24集
【主        演】： 高賢貞、權相佑、車仁表、李水京
【接　　檔】：我的女朋友是九尾狐【官方網站】： http://tv.sbs.co.kr/president/

內容簡介：

改編自畫家朴仁權的同名漫畫，講述了電視臺主持人出身的韓國第一位女總統徐惠琳和檢察官河道也在政界展開的故事。

《大物》人物介紹：
 

呢套戲真係一波幾折, 喺06年時已經話想拍, 當時已搵咗高賢貞同權權, 但最後製作公司的資金問題拍唔成, 一路hold住......至2010年, 電視台終於同製作公司商討, 結果就拍得成啦! 呢套劇係改編自漫畫, 當然角色設定同原作有d唔同啦!

 

高賢貞本身同權權係同一個鄉下的, 原本係做電視主播, 可惜一對住鏡頭就食螺絲, 喺高空拍攝又畏高, 終於俾新聞部調佢去做電台, 後來再調去做兒童節目主持, 但因為佢老公去阿富汗採訪時被殺死, 剩番佢同個仔, 於是激發佢爭取權益! 高賢貞由鄉下去首爾時, 撞見俾人找麻煩的權權, 權權就叫佢一齊去火車站, 自此權權就開始暗戀佢啦 (由高賢貞做主播再到做總統, 權權都暗戀咗好耐架啦, 長情到呢......) 我仲以為高賢貞feel唔到權權暗戀佢啦, 原來佢又知喎! 當高賢貞做總統後, 有一幕佢同權權散步, 佢叫d保鑣全部擰轉面, 之後主動kiss權權, 搞到權權幾開心呀, 後來當然係同權權一齊啦!

 

權權本身係鄉下出身, 佢爸爸德久叔 (林玄植) 係賣牛骨湯的, 權權有書唔讀走去舞廳教d闊太跳舞, 激到德久叔死死下, 後來仲差d將權權"自宮"!!! 之後權權有個老死的爸爸係做議員的, (呢個老死後來幾次出賣權權, 令到權權冇得做檢察官佢都有份) 權權同佢老死爸爸有d牙齒印, 老死爸爸唔順氣,喺咁多人面前叫德久叔lam鞋面, 咁就唔會告權權, 權權叫德久叔唔好理佢, 但德久叔真係幫人lam鞋面!!! 呢件事令到權權發覺要識得法律先可以保障自己, 於是發憤圖強讀書, 就係咁做咗檢察官, 亦令德久叔好自豪!!!

 

後來高賢貞老公死咗, 總統去鄉下探高賢貞, 佢想去食牛骨湯, 就去咗德久叔的舖頭, 總統對德久叔的手勢讚不絕口, 於是請德久叔去青瓦台做野! 後來權權查朴根瀅洗黑錢時得罪咗朴根瀅, 佢想權權冇得做檢察官, 李秀景知道後就俾咗半幅畫德久叔, 另外半幅佢自己keep住, 佢叫德久叔將幅畫俾朴根瀅睇, 咁朴根瀅就會知道咩一回事, 會放過權權! 但可惜李秀景估計錯誤, 德久叔唔單至幫唔到權權, 反而仲俾朴根瀅的下屬殺死!!! 果幕權權去停屍間認屍時的戲份, d眼淚鼻涕係咁流, 真係睇見都想喊......後來權權誓要追查德久叔點死, 但李秀景為咗幫車仁表, 死都唔肯講, 搞到權權好嬲! 之後權權冇得做檢察官, 就靠自己去查, 原來車仁表外父亦有份洗黑錢, 於是不斷努力追查落去, 後來當然可以翻身做番檢察官啦!

 

而車仁表本身係檢察官出身, 但做咗議員後不擇手段, 佢本身好想做總統, 而佢爸爸以前曾經選過7次議員但都失敗, 於是對朴根瀅 (李秀景爸爸)好不滿; 但又要靠外父支持, 但同個老婆係冇感情的! 佢遇到高賢貞後, 不斷游說高賢貞參選, 本來想利用佢打擊朴根瀅, 但後來先發覺高賢貞唔係佢想像中咁蠢!!! 而高賢貞誤打誤撞下去參選, 之後仲逐步升級, 後來仲同車仁表一齊去選總統, 當然最後係高賢貞當選啦! 車仁表好失望, 我仲以為佢會玩完啦, 但後來高賢貞搵佢做美國特使, 後來仲洗心革面重新做人, 又同老婆關係好咗, 真係有d反轉!!!

 

李秀景本身喺美國返黎, 一心諗住搵朴根瀅報仇, 因為她係私生女的關係, 一直好想知爸爸係邊個; 返到黎韓國後就去咗間畫廊做, 表面係為議員而設的畫廊, 實際上係靠賣畫幫議員洗黑錢的! 車仁表後來知道李秀景係朴根瀅的私生女, 就話會幫佢報仇, 於是車仁表就搞內訌, 聯合其他人"反"朴根瀅, 而且仲同李秀景有感情! 而朴根瀅由始至終都冇承認過李秀景係自己個女, 但當朴根瀅被車仁表被迫退下時, 李秀景反而冇嬲朴根瀅, 反而仲好似有d後悔咁......後來李秀景知道被車仁表利用時, 不斷叫車仁表收手, 但車仁表一意孤行, 李秀景至此先知車仁表從來冇愛過佢, 失望至極, 最後李秀景都係要返美國!

 

其實呢套因為係政治劇的關係, 有d場面都幾悶下, 但呢套係權權新作, 點都要睇落去, 戲中權權的表情好生鬼, 當然德久叔亦係好笑啦, 所以我都唔想德久叔死架!!! 當初呢套劇播時, 我都好驚收視好似前作"Cinderella Man"同"毒愛"咁差架, 但有高賢貞喺度, 我諗唔會太差啩, 果然第一集收視已經唔錯啦, 直到結局都維持到20點幾的收視, 雖然上唔到30點, 都但已經唔錯架啦! 而且權權仲憑呢套劇攞到SBS的最佳男主角添, 我真係好開心呀!!! 高賢貞真係福將呀, 拍親邊個都有好收視, 希望權權d衰氣有咁遠走咁遠呀, 好運常來呀~~~