誘惑

【劇    名】誘惑
【類    型】SBS月火劇
【播出時間】2014年7月14日
【接    檔】Dr.異鄉人
【導    演】朴英洙
【編    劇】韓智勳
【主    演】權相佑、崔智友、李廷鎮、朴河宣、李正信
【集    數】20
【中文制作】鳳凰天使韓劇社
【簡    介】被逼入絕境的男人（權相佑飾），面對無法拒絕且充滿誘惑性的提案，做出了無法挽回的決定，進而在四名尋找眞愛的男女之間引發了一系列無法預測的愛情故事。

人物介紹:

人物關係圖:

呢套劇係權權同崔智友自"天國的階梯"後相隔11年再合作, 我當年就係睇咗"天國的階梯"而鐘意權權, 直到而家, 所以今次佢地再合作就睇咗套劇, 但個劇情真係麻麻地~~~

呢套劇係講權權同朴河宣係兩公婆, 權權同人合作搞生意, 但生意唔多掂, 加上個partner唔見咗, 後來先知佢黎咗香港, 於是權權兩公婆就黎咗香港搵partner, 點知原來partner已經死咗, 因為生意失敗, 爭落人一身債, 但個partner淨低咗d錢俾佢地, 咁權權兩公婆好開心咁遊覽香港, 但最後朴河宣見冇哂錢想去自殺, 咁啱俾黎香港公幹的崔智友見到救起佢, 後來先知權權係佢老公 (原來權權同崔智友有過一面之緣, 因為權權當年去過崔智友公司面試, 但冇就請權權)

崔智友知道佢地冇錢之後, 就去搵權權, 話只要陪佢3日, 就俾10億權權 (因為咁啱崔智友的律師要返韓國) 開頭權權唔願意, 加上朴河宣唔鐘意, 但最後因為權權真係冇哂辦法, 急須呢筆錢周轉, 所以最後瞞住朴河宣, 接受崔智友呢個提議......但原來呢3日只不過係做崔智友的助理, 幫佢處理文件, 陪佢開會等等, 完全冇不道德的事發生......最後朴河宣知道後好傷心, 一味覺得佢地係有不道德關係, 任憑權權點解釋都冇用......

而李廷鎮黎香港係要接返個仔返韓國, 因為幾年前佢喺香港識咗個女歌手, 但原來呢個女仔幫佢生咗個仔 (但李廷鎮完全唔知, 加上佢本身已經結咗婚, 有3個女), 最後個女仔因病逝世, 咁個女仔的朋友 (係肥媽瑪利亞客串!!!) 寄封信俾李廷鎮佢帶返個仔走......李廷鎮同個仔見面後, 佢個仔蕩失路, 俾朴河宣見到就帶個仔返酒店, 俾李廷鎮見到, 加上個仔好鐘意朴河宣, 令到李廷鎮對朴河宣印象深刻......

返到韓國後, 權權點同朴河宣解釋都冇用......加上之前幫崔智友做野時知道個project點運作, 後來權權直程唔做生意, 去咗崔智友公司做野 (加上權權的前輩喺崔智友公司打緊工)......而李廷鎮亦因為個仔的關係, 成日約朴河宣出黎見面, 後來仲極力邀請佢做佢個仔的保母, 朴河宣見權權同崔智友都可以一齊做野, 亦想激下權權, 所以就接受咗, 仲搬去李廷鎮的別墅度住......權權知道後當然叫朴河宣唔好做, 但朴河宣話之前叫權權唔好要10億, 但權權唔聽佢講, 所以今次都唔好阻佢去做保母......最後權權盡力去補救, 但朴河宣已經決定離婚......權權見到咁亦唯有接受......

後來權權同崔智友亦開始慢慢有感情 (但起初係崔智友暗戀權權先的)......而李廷鎮知道權權同朴河宣的關係, 亦開始著緊朴河宣, 當佢同老婆離婚後, 就即刻同朴河宣結婚, 而朴河宣個心唔係鐘意李廷鎮, 佢只係利用李廷鎮黎打擊崔智友的生意 (因為李廷鎮同崔智友係生意上的競爭對手), 同埋想權權同崔智友分手, 而李廷鎮亦唔介意俾佢利用......但最後因為生唔到仔, 加上李廷鎮D女唔鐘意佢, 而李廷鎮亦同前妻關係糾纏不清, 到最後李廷鎮同朴河宣講可以打低崔智友間公司的時候, 朴河宣亦已經放低咗對權權同崔智友的成見, 最後決定同李廷鎮離婚, 後來結局李廷鎮想同佢喺返埋一齊, 但佢都拒絕咗......

而崔智友亦因為有癌症, 佢唔想權權知道, 亦唔知會唔會死, 所以唔去做手術, 但最後權權知道咗, 加上癌細胞擴散, 所以最後都去做手術......結局係權權同崔智友去咗香港出席酒店儀式, 大團圓結局......

呢套劇的劇情真係有d奄悶, 淨係講崔智友做唔做手術都講咗兩三集, 而朴河宣個角色仲差, 同權權離婚後成個怨婦咁, 就算同李廷鎮結咗婚後都係唔開心,  加上朴河宣喺套劇裡面成日皺眉頭......難怪當初搵尹恩惠做權權老婆, 尹恩惠拒絕咗啦, 諗落都啱......

呢套劇的特別之處, 就係黎咗香港拍外景囉,可惜收唔到風, 令我冇機會喺香港見到權權......