EG sim card

呢款EG sim card就係我今次去韓國時用的, 因為我一個人去旅行, 用wifi egg又好似唔化算, 加上又要日日叉電, 兼且又要還機; 而喺香港買到sim card, 又唔知好唔好用, 所以就買sim card用啦~

但其實我都驚驚地呢款sim card用唔用到, 因為之前喺網上爬文, 有D就話好好用, 有D就話唔好用, 而且佢的官方FB, 亦都有好多人投訴話用唔到等等......不過我一定要用, 所以就博一舖啦!!!

其實可以喺網上買, 不過我反而選擇親身買~

呢款就係EG sim card的正面, 我一落機, 因為係朝頭早, 導遊就俾時間我地去食早餐, 我就即刻去GS 25買啦 (我都只係買個麵包食就算, 因為搞呢個都搞到好耐)


我走去同收銀講話買EG sim card (佢冇擺出黎), 個男仔都唔多明, 後來咁啱牆上有呢個sim card的標誌, 咁我就指住個標誌, 咁佢就明啦, 佢攞塊版出黎問我部電話係I phone定Samsung, 要買1GB定2GB.

我本身用Sony, 所以同Samsung都一樣用micro sim card, 所以我話要Samsung果種sim card, (佢寫dual其實都啱架, 因為佢唔知你部手機係用大sim定細sim), 咁我玩5日, 1GB都夠用啦, 咁佢就俾咗呢款我, 30000won~

佢另外有款係2GB, 要50000won~

佢係用3G上網, 就算部電話可以用4G, 佢都唔可以上到去4G~

咁部電話要唔好開機住, 要先拎走自己張sim card, 再拆開包裝, 將EG sim card插入自己部機, 然後開機, 再開wifi (仁川機場wifi都好用)~

我未出發前, 已經事先download佢個app, 個app可以check自己用咗幾多MB, 亦可以增值~ 而個APN就冇得預先set定 (因為我喺香港試過, 係唔得嘅)

其實呢個APN係驚用戶的電話唔能夠自動收到韓國的訊號時, 要自己喺部電話度set, 好好彩我部電話係自動收到韓國訊號 (呢張咭係用Olleh網絡)

佢話部電話要開關機4-5次先會偵測到韓國訊號, 我就插咗張咭後熄咗機一兩次, 之後開機開wifi就已經用到~

而且仲要記住sim card的最後3個數字, 因為用黎識別 (即例如最後的數字係123F, 咁就要記住123, 前面果d唔使記)

上面張咭有寫你的韓國電話號碼 (010果個就係), 下面的括號就係sim card的最後3個數字

去到個app, 佢會一步步教你點做, 例如入你個username, password, 幾時入境及出境等等~

另外佢要你影低passport有相及姓名果一頁, 因為韓國係用實名制, 驚你張咭俾其他人用, 而且亦杜絕韓國人使用.

佢呢個app有中英日韓版本, 初時我用中文版本, 但影完相upload時, 佢就話我張相解像度低要再影過, 如是者影咗幾次, 再upload幾次都話唔得......(呢個時候電話d電都好咗好多......)

我火起上黎, 即刻用英文版本, 再upload自己的passport, 結果就成功咗啦!!! (所以用唔到中文版本upload, 可以試用英文版本)

咁佢會喺辦公時間將你的資料登記~

我之前爬文時, 話呢款sim card係可以上網, send sms及講電話 (包打出打入), 但數據方面係要你自己喺個app度揀返要1GB, 咁佢地先會將30000won入面分成兩份, 一part係用黎上網 (16500 won), 另一part係通話費用 (13500 won)

所以我登記好後, 已經差唔多係韓國時間朝早8點幾9點, 咁我就等佢幫我set up咗d資料先~

後來去到仁川, 已經可以上到網, 信號收得好好 (當時我都未set要500MB定1GB)

(之前睇爬文, d人話去到濟州島都收得好好; 我去到春川都係收得好好)

咁我就諗住自己set返要1GB啦, 因為佢話要自己整, 但後來我部電話收到好多韓文sms (當然唔知佢講乜啦), 後來佢又有英文sms, 大意係話如果你想上網, 就要自己加錢, 否則第二日會停......

但我當時又冇理到佢, 繼續上網同人whatspp, (而家諗返都覺得勇, 因為如果唔自己set返d GB, 咁我打後果幾日點聯絡韓國朋友呢)

之後又收到佢的韓文sms, 大意係話張sim card期限係3個月之後 (佢呢張card其實好得意, 佢一定要有voice balance [即通話費], 先可以上到網, 如果voice balance係冇錢的話, 就上唔到網, 要你去增值先可以, 佢可以上官網度增值 [要事先set username 及password, 可以用信用咭增值], 亦可以去GS25, CU等便利店增值, 但我今次用唔哂, 所以冇增值)

但後來隔咗一陣, 又收到佢的英文sms, 內容係話top-up for data has been completed (1GB), 另一個sms就話successfully charged.  即係話佢原來已經自動幫我加咗1GB落張sim card度啦~

不過就同其他用家一樣, 就係我都係用唔到olleh wifi, 佢官方FB教人將自己電話的IMEI, 及wifi-mac address預先抄低, 然後send俾官方, 咁佢就會幫你整個wifi (我記得佢幫你整好後, 部電話要開機關機幾次就可以用到olleh wifi)

不過我冇做到呀, 其實我預先有抄低, 但後來諗諗下又覺得煩, 因為要上去佢個官方FB, 然後又要等佢覆, 其實有3G已經好好用, 哈哈哈~~~

而佢話可以send sms, 我試過send俾韓國朋友, 但換來對方一句唔知咩韓文 (我覺得應該係對方收唔到的意思), 但錢就照扣咗囉......呢度要扣分......

但打出打入就ok, 初初我唔知呢張sim card打唔打得出電話, 喺酒店lobby叫個女仔幫我打電話俾我其中一個韓國朋友, 哈哈~ 酒店的女仔好好人呀~

後來韓國朋友打返電話俾我, 質數OK喎~ 隔兩日我又打返電話俾佢, 又OK喎~ (當然會計通話費啦)

之後上返佢個app, 睇下自己用咗幾多, 原來呢5日我用咗400幾MB, 我只係send whatsapp, 上FB, 冇睇片, 只係用咗某個app的free call幾次, 所以都OK囉~

下次再去韓國的話, 都可以用返原本張咭 (當然要加咗錢落去先啦) 咁就唔使再買過啦~~~

總括黎講, 除咗上唔到wifi, send唔到sms, 其實淨用佢上網加打電話已經好夠用架啦, 當然你要用黎睇片就多多都唔夠用啦~