【韓 名】：두번째스무살
【類 型】：TVN金土劇
【首 播】：2015年8月28日
【時 間】：每周五、周六晚北京時間19:30各播放一集
【接 檔】：Oh！我的鬼大人
【導 演】：金亨植
【編 劇】：蘇賢京
【主 演】：崔智友 李尚允 崔元英 金珉載 孫娜恩
【集 數】：16集
【簡 介】：講述了19歲高三時懷孕而不得不放棄學業的女主人公在39歲時與兒子考上同一所大學後發生的一系列搞笑浪漫故事
【官 網】：http://program.interest.me/tvn/secondtwenty
人物介紹:
講述崔智友喺19歲時, 糊里糊塗大咗肚, 而同老公崔元英結婚生仔兼去埋德國, 嫲嫲去世時冇返過韓國, 後來先至回流韓國, 但因為崔智友只係中學畢業, 而崔元英就係大學教授, 覺得同崔智友已經冇話題, 而決定同崔智友離婚, 而崔元英本身性格係唯佢獨尊, 每次有咩事都要崔智友同金珉載寫"保證書", "公證書"等等, 以保障自己喎......
但實情離婚的原因係崔元英識咗第二個女人 (朴孝珠), 呢個女人的老豆可以幫到崔元英喺大學更上一層樓, 所以就同朴孝珠一齊. 而崔元英同崔智友個仔金珉載, 本身好崇拜老豆, 覺得老豆講乜都啱聽, 所以同老豆一樣好唔鐘意崔智友; 而崔智友一知道老公要同佢離婚時, 佢仲以為係老公嫌佢冇學識, 所以就瞞住兩父子去考公開試入大學, 結果全家人去咗雨川大學度教書 (崔元英) 同上堂 (崔智友同金珉載)~
呢度我覺得崔智友簡直係冇咗自己, 咁多年黎佢的中心只係有呢兩父子, 為咗兩父子, 忍辱負重, 唔敢發惡, 崔元英或者金珉載話佢呢樣唔好果樣唔妥時, 崔智友只會唔敢出聲, 崔元英話東崔智友唔敢話西, 佢一心以為只要讀到大學就唔使離婚, 邊有咁易架?!
但金珉載本身唔係考雨川大學, 而崔元英本身亦唔係想去雨川大學教書, 但陰差陽錯下, 同崔智友一齊喺同一間大學啦~ 所以當崔智友喺大學裡面見到兩父子時就好驚, 左閃右避, 亦都唔俾兩父子知佢讀緊大學.....但最後當然穿咗煲啦......兩父子好驚訝之餘亦覺得崔智友"影衰"佢地, 所以崔元英不斷催促崔智友快d離婚, 不斷叫佢唔好再返學; 金珉載就話寧願重考大學都唔想同阿媽讀同一間大學......但咁啱崔智友誤以為自己生cancer就黎死, 所以堅決等到3個月後先離婚......
而崔智友返大學時亦受盡白眼, 因為佢比其他大學生年齡大成截, 個個都叫佢做"阿豬媽"; 咁啱有一堂的教授就係初戀情人李尚允, 但其實只係李尚允暗戀崔智友, 崔智友完全唔知佢暗戀自己, 仲懵盛盛以為喺大學見到個老友, 點知李尚允一見到佢就火都黎, 第一堂就已經罵崔智友唔好阻住佢地上堂; 後來李尚允無意中執到崔智友的筆記簿, 先知佢有cancer, 態度就改變哂, 同以前的高中同學一齊完成崔智友的心願......後來李尚允知道崔智友根本唔係有cancer就好忟, 因為一心想幫佢完成心願架嘛哈哈~
崔智友後來因為幫女同學出頭, 一度繼續俾其他學生嫌棄; 但有女同學就感謝佢幫佢地出頭, 而慢慢開始接納崔智友, 加上崔智友有跳舞底子, 無意中喺大學的學會招生中跳舞, 所以俾同班同學羅順南招攬, 因為崔智友當自己係後輩, 喺跳舞學會執頭執尾都唔介意, 而令到同學對佢另眼相看......
後來李尚允見到崔智友左閃右避, 先知佢原來隱瞞崔元英黎讀書, 亦知道崔智友做part time賺學費, 所以就叫佢黎自己辦公室做助手, 因為李尚允知道崔元英想同崔智友離婚, 但有次無意中知道咗崔元英同朴孝珠的不倫關係, 就算自己暗戀崔智友亦唔想拆散人地家庭, 所以將崔智友推返俾崔元英, 亦不斷同崔元英鬥法......但李尚允亦俾崔元英知道自己鐘意崔智友......
後來崔智友主動同崔元英提前日子搞離婚, 今次輪到崔元英唔肯, 用盡好多藉口去拖延時間, 又話俾返間舖崔智友, 又話講到明係幾時搞離婚等等......而金珉載因為同女朋友孫娜恩拍拖, 搞到學業退步, 於是靜靜返屋企搵返崔元英要佢寫的"公證書", 點知咁就俾佢發現到父母離婚的"公證書"......亦因為咁對崔元英反感, 變咗同情崔智友, 亦同崔智友親近咗好多......
崔智友無意中得知原來李尚允為咗佢, 保留咗佢嫲嫲整辣炒年糕的秘方同埋間舖頭, 佢好感動, 但仍然冇諗過李尚允原來暗戀咗佢咁多年......
之後崔元英喺舊同學口中知道第二間大學有個教授位, 於是想賣甩朴孝珠, 想同崔智友好返, 於是帶崔智友去同其他教授見面, 點知就俾崔智友知道原來當年嫲嫲去世時點解崔元英阻止佢返韓國奔喪的原因, 崔智友一怒之下立即同崔元英離婚, 而崔元英亦知道今次真係冇得再挽回崔智友, 唯有應承離婚並且搬走, 而金珉載亦跟返崔智友生活......呢度我睇到大快人心, 因為崔智友終於知道自己想要d乜!!!
而最諷刺的係, 崔智友其中一堂的教授竟然係朴孝珠, 而崔智友到後來無意中發現朴孝珠的手袋, 同佢當日去劇場時見到崔元英同個女人一齊時的手袋一模一樣, 於是崔智友同朴孝珠講將崔元英送俾佢, 令到朴孝珠非常錯愕!
而朴孝珠想陷害崔元英以報復佢想分手, 但俾李尚允知道咗, 力勸佢唔好咁做, 因為崔元英都已經唔愛佢, 何必仲要咁做? 後來崔元英亦去咗另一間大學做教授, 但朴孝珠仲靜靜走去睇崔元英, 見到佢不修編幅果個樣就好似驚咗......
崔智友離婚之後, 反而退咗學去賣辣炒年糕, 因為佢覺得學費加雜費太貴, 做幾多part time都要借錢讀書, 咁佢先至唔讀......呢度我覺得佢應該讀埋先囉, 咁難得先考到大學......
而李尚允知道佢離婚後就同佢示愛, 仲同崔智友: 你都鐘意我架呵? 但崔智友唔認, 咁李尚允就話好啦, 既然你唔鐘意我, 咁我要做d野黎令你覺得你真係唔係鐘意我......後來李尚允同崔智友一齊返去崔智友鄉下拜嫲嫲, 咁啱崔智友想睇返當年同李尚允埋下的時間膠囊, 先知李尚允原來由當年已經鐘意咗佢, 崔智友感動之餘亦表白佢的心意~~ 最後當然係大團圓結局啦!!!
沒有留言:
張貼留言
注意：只有此網誌的成員可以留言。