權相佑首度訪港 – 我和ks阿豬媽的追星之旅 (14-4-07)

權權第一次到港﹐令到我和ks阿豬媽極度瘋狂﹗因為今次我地係join埋”權紀錄”﹐佢地的行程我地跟足哂﹐所以我同ks今次懷住好興奮的心情迎接權權﹗


因為我地由”權紀錄”果度得知今日權權會搭國泰CX417黎香港﹐而到港時間係1:05pm﹐所以我地就約定10:30am到機楊等權權﹐到咗機場之後就會合”權紀錄”的人﹐我地係B區閘口霸定個靚位﹐而我地亦見到來自中台日的fans﹐而我地都同佢地有傾有講﹗之後”權紀錄”的人又拉開banner﹐派紙牌同派氣球俾我地﹐而有d係B區出黎的人見到我地咁多人而嚇親﹗而我同KS都唔敢行開呀﹗

紙牌的其中一款



到咗11點幾時﹐我地望到TVB部攝影機﹐我地就用手上的紙牌同氣球遮住﹗我仲諗會唔會係宋芝齡做訪問﹐但原來係”東張西望”的另一位主持章志文﹗佢不斷咁搵fans做訪問﹐包括香港同內地fans﹐我只係聽到佢地話︰”sang woo, san lan hea yo!”

我同ks緊係繼續遮住自己啦﹗之後佢地就走咗啦﹗到咗12點幾﹐突然聽到有人話︰”權權唔係喺B區出閘﹐係A區至啱呀﹗”於是我地唔理三七廿一﹐由B區跑去A區﹐係咁跑跑跑﹐跑到我氣都咳﹐斷氣咁滯﹗而佢地就拿拿聲又再拉起banner, 一齊係A區等權權﹗之後到1點鐘﹐都未見權權出現﹐我地非常心急﹐不斷有人問究竟幾時到港﹔此時fans已經越黎越多﹐而TVB部機亦係遠處拍攝﹔而我同ks就越過欄杆企喺接機區 (當然有人咁企我地先夠膽啦﹗)


大約到咗2點﹐權權終於到A區啦﹗我見到佢初時戴起黑超﹐不過就好快除咗﹐而接機區係呈U型﹐但權權就反而直行﹐唔過我地呢邊﹐所以D fans即刻衝過去﹐而我見到咁樣就同ks講︰”一齊衝過去啦﹗” 於是成班fans就衝過去見權權﹗現場所見﹐權權比我高成個頭﹐塊面比較瘦﹐不過皮膚又白又滑﹐好靚仔﹗當時佢見到有咁多fans都驚驚地﹐又唔敢行路﹐d保安圍成一個圈圍住佢﹐佢俾我地同電視台d人行到窒窒下﹗不過佢一路都keep住笑容﹐不斷同我地揮手﹐又專登擰轉面同我地呢邊揮手﹐我見咁多人擁上前驚同ks走失﹐我就話不如繞住手一齊行﹐冇咁容易跌倒﹗沿途d人又甩鞋﹐d氣球同banner又跌哂﹗

借用on.cc張相


好快權權就上車返紅磡海逸酒店﹐而我同ks又跑番去B區集合搭旅遊巴追權權﹗因為之前條氣都未順﹐而家又再跑過﹐嘩﹐隻腳痛到我呀﹗而原本”權紀錄”要我地唱天國的主題曲 “想你”﹐不過都冇人唱﹐淨係掛住追權權﹗而因為權權已經遲咗黎香港﹐所以原定跟住佢去酒店亦cancel咗﹗而”權紀錄”亦搞咗個function係日航酒店﹐但就好神秘﹐當初報名時乜都唔講﹐又話唔黎會後悔﹐又話權權唔知會唔會黎﹗不過雖然接機時我同ks都有影相﹐但效果完全唔得﹐只係影到其他人的人頭﹗

去到日航之後成3點幾﹐我地就點名同交入數紙﹐入場費係$260﹐但就好亂﹗因為ks原先張牌係113﹐但入去後見到有個女仔坐咗個位﹐ks睇過她張牌又係113﹐於是我地又再換過﹗之後見到鄭儀同jess﹐佢地2點幾已經黎到﹐而佢地都話好混亂﹗覺得”權紀錄”安排得唔係咁好﹗到所有人入坐之後﹐我地見有野食﹐就不停咁攞野食﹗之後”權紀錄”d人就話食到5點﹐然後攪抽獎﹐不過抽得實在太慢﹐而我同ks都抽唔到﹗而會場就播放06年12月權權去台灣的片段﹔我地由3點幾坐到5點幾權權都未出現﹐我地仲諗佢會唔會黎!

直到差唔多6點﹐權權終於黎到啦﹗

佢係會場的左邊行入黎﹐司儀 (唔係benny, 係”權紀錄”d人) 話唔好衝埋去﹐要靜d﹗之後權權就上台﹐用廣東話同我地講︰”大家好﹐我係權相佑﹗” 我地就好興奮咁不停歡呼﹗之後d人唔理咁多﹐係咁衝上台前影相﹐之後權權就話好開心見到大家之類的說話 (因為我顧住影相﹐都冇乜點留意佢講乜﹗) 而ks部相機又冇乜電﹐她唯有用電話影﹔而有d內地fans就不斷咁推我地想影相﹐不過我當然唔理佢地啦﹗之後有位香港的80歲婆婆要同權權影相﹐權權就好樂意同佢影相﹗

之後”權紀錄”送咗一紮花俾權權﹐同埋有個切蛋糕儀式 (而花佢冇帶走﹐蛋糕亦冇食到﹗) 之後再講咗幾句就走咗啦﹗而權權走的時候﹐果d內地外省fans就一窩蜂咁湧埋去﹐雖然有保安保護﹐而司儀亦叫佢地冷靜﹐但佢地完全唔聽﹐而且仲不斷將權權推到牆角﹐我見到權權個樣有d驚驚地﹗之後果班fans仲將其中1張枱推倒﹐令權權更加之驚﹗最後在保安護送之下就匆匆咁走咗啦﹗而果班fans亦死跟到底﹗前後權權只係黎咗15 mins﹐我地緊係覺得唔夠喉啦﹐連合照又冇﹐簽名又冇﹗最後”權紀錄”將有剩的memo紙派俾我地﹐

同埋影大合照﹗我同ks都覺得果班外省fans實在太恐怖﹐唔知會唔會嚇親權權呢﹖





*請載請註明出處, 多謝合作*