權相佑首度訪港 – 我和ks阿豬媽的追星之旅 (15-4-07)

因為ks上午要返半日工﹐所以我地約定3pm在尖沙咀mtr等﹗到咗之後就去星光大道的出口出去﹐一路行都唔見”權紀錄”d人﹐於是打電話俾佢地﹐先知原來佢地俾錯信息﹐係應該在文化中心門口 (半島對面) 果度劃咗專區俾我地等﹐於是我地就行過去﹗現場所見﹐有3個區域俾fans等﹐同入口呈一個三角形﹐我地揀對正門口樓梯果區 (因為今晚明星會係呢度落車行紅地毯上去) 而我地由3點零鐘一路等﹐等咗幾個鐘呀﹗又冇位坐都幾辛苦吓﹐而當中又有攝錄機周圍影﹐我地又要避佢地﹗

之後到咗6點幾﹐人開始越黎越多﹐第1個入會場的係毛舜筠﹐不過此時我地亦發覺我地企的位置唔係幾好﹐因為我地永遠影明星的背面﹐而且d明星好少會擰轉面俾我地影相﹗而記者又企哂喺2邊的有利位置﹐所以之後陸續有明星﹐我地亦只能靠估係邊個囉﹗

呢個時候有班係內地明星陳坤的內地fans叫我地讓個位俾佢地影相﹐我地當然唔肯俾佢啦﹐佢地仲話︰”權相佑都未黎啦﹐你俾我地影咗陳坤先啦﹗” (但當時陳坤根本未到)﹔而當陳坤到場時﹐呢班fans不斷叫陳坤的名﹐但佢唔知係咪聽唔到﹐始終都冇擰轉面望佢地﹐令到佢地好失望﹗大約6點幾﹐見到benny同宋慧喬一齊出現﹐不過我地都冇叫到benny﹐因為距離太遠﹐benny又一直拖住宋慧喬﹐不過benny著西裝都好型仔﹗

過咗10幾分鐘之後﹐遠處聽到有人話︰”權權黎啦﹗” 於是我地舉起相機準備影相﹐又不斷叫”sang woo!”權權著起西裝真係好鬼死靚仔﹐佢都好識做﹐企定定俾2邊的記者影相﹐又不斷揮手﹔佢又擰轉面見吓我地企的位置﹐我同ks即刻影相﹐但好可惜影黎影去都係手震﹐而且權權好快就轉身入會場﹐所以影唔到權權﹗

我同ks就即刻走去話開放俾800人坐的免費大電視度睇﹐可惜已經睇唔到權權入會場簽名啦﹗而有d”權紀錄”的人就入會場做觀眾﹐不過點會有飛我就唔知啦﹗而我同ks都覺得早知應該一早坐係呢度好過﹐雖然係坐樓梯﹐不過起碼可以睇得清d嘛﹗之後我地坐咗一陣就即刻返屋企睇電視﹐而我亦唯有係電視度影咗呢幾張相囉﹗

亦因為太攰的關係﹐所以尋日同今日我一瞓落床度就唔願郁啦﹗





*請載請註明出處, 多謝合作*