人物關係圖:
劇情簡介：
本劇描述一群沒辦法談戀愛的女性，劇中三位女性的愛情困擾。忘不了前男友又沒有男人緣、年紀近三十歲的職業單身女性藤井惠美(香里奈 飾)。惠美的高中學妹，沒有認真談過戀愛又身陷不倫之戀的酒店小姐小倉咲(吉高由里子 飾)。擔任派遣社員、總是遇到對自己不是真心的男人的半澤真子(大島優子 飾)。同住的三人，有時候互相安慰，有時候吵架，一起透過戀愛的話題獲得成長。
呢套劇係講中時下不同女性的心態. 香里奈飾演一個男人婆; 吉高由里子係一個自以為好了解男人, 可以隨便同人地有一夜情, 但其實從來冇認真咁拍拖的女生; 大島優子飾演一個兼職社員, 好想遇到個真心的男人的女生.
後來機緣巧合下3個女仔一齊住喺大島優子的親戚屋企. 香里奈同同事田中圭曾經拍過拖, 可惜最後分咗手, 後來田中圭有女朋友, 但香里奈仍對佢念念不忘, 但只敢以好朋友自居. 而佢公司老細就係萩原聖人, 佢老婆係稻森泉, 兩公婆表面睇好恩愛, 但其實感情已經淡咗......
吉高雖然係做夜店小姐, 但其實佢有個心願係做作家, 可惜想實現機會唔係咁容易......有一日吉高喺夜店服侍人時遇上萩原, 初時只係普通顧客同小姐的關係 (並無上床), 後來慢慢就開始傾心事, 而吉高不知不覺咁鐘意咗萩原, 就算明知佢有老婆都唔介意......
大島就去咗一間公司做兼職員工, 喺裡面有個男同事極力追求佢, 後來大島亦答應交往, 可惜呢個男同事想同大島上床 (劇情講大島係處女), 搞到大島唔知點算, 就問香里奈同吉高的意見. 但最後去到酒店, 大島都係唔想上床, 點知呢個男同事就即係同佢分手, 可憐的大島都唔知發生咩事......(後來當然知啦)
而田中圭雖然有女朋友, 但原來女朋友的父母想佢去相睇, 想佢去嫁俾醫生, 因為佢老豆係開醫院的, 雖然呢個女仔有帶田中圭去見家長, 但佢又聽父母話走去相睇, 咁啱俾香里奈見到.....但香里奈冇同田中圭講呢件事.......
稻森泉有日突然同萩原講想生仔, 又話想換大間d的屋, 萩原覺得好奇怪, 因為結婚初期係稻森泉話唔想生仔, 而且佢已經係高齡產婦, 就算即刻走去睇醫生, 都唔係咁容易有, 但稻森泉仍然唔想放棄生仔的機會......後來喺一次BBQ的時候, 吉高終於知道稻森泉就係萩原的老婆 (吉高之前因為香里奈的關係見過稻森泉), 而稻森泉亦知道咗萩原有外遇, 就係吉高, 後來吉高同萩原都分咗手.......
香里奈後來認識咗一個警察, 呢個警察年紀細過香里奈, 當香里奈仲十五十六時, 吉高就叫佢放膽試下, 而香里奈亦想忘記田中圭, 就嘗試下同警察交往......可惜最後因為田中圭的女朋友同佢講分手, 原本警察約咗香里奈睇劍道比賽都唔去, 走去安慰田中圭, 最後警察都同香里奈分手......
大島後來在公司識咗另一個男同事平岡祐太, 後來發展成為情侶, 而且大島亦奉獻咗第一次俾平岡......但因為前男友仲喺同一間公司做野, 有時工作上的事, 大島係要同前男友聯絡, 平岡見到就好嬲; 加上平岡周不時都要大島喺佢屋企過夜, 就算大島話冇帶另一套衫換, 平岡都話冇問題, 結果有好幾次大島係有幾日著同一套衫返工, 令佢好尷尬.....亦因為平岡話唔想再見到大島同前男友傾計, 就算大島話只係為公事佢都唔信, 最後亦分咗手......而且大島仲俾公司辭退.......
後來田中圭知道香里奈仲鐘意自己, 就去追番香里奈, 而且仲想香里奈跟佢去美國發展; 呢個時候田中圭的女朋友話想同返田中圭一齊, 但田中圭知道對方的父母係想搵一個醫生去繼承對方的醫院, 所以拒絕咗......但呢個時候香里奈之前合作開的公司, 對香里奈的工作表現讚好, 好想香里奈加入佢地公司做野......香里奈諗咗好耐, 決定去新公司, 並且同田中圭做番普通朋友, 而田中圭就自己一個過美國......
而吉高幾經努力之下, 終於成為作家.......
大島自從俾公司辭退後, 有次見到間西餐廳的食物好似唔錯, 於是入去幫襯, 發現果度原來得一個人做野, 後來大島自薦去幫手做侍應, 呢個老闆好慢熱, 後來先知老闆有個仔, 但老婆已經死咗幾年, 大島對佢個仔照顧有加, 慢慢老闆不知不覺咁鐘意咗大島......香里奈知道呢件事後, 就喺一個亮燈儀式上借機用燈光叫大島上台, 之後餐廳老闆就向大島求婚, 大島亦應承咗佢~~~
沒有留言:
張貼留言
注意：只有此網誌的成員可以留言。