我就同的士司機講去東大門, 佢可能知道我地係遊客, 佢就放低我地喺Doota (當時已經差唔多5pm), 咁我地就喺Doota的food court度搵野食, 搵到以下呢間食拌飯, 但原來係即叫即製架, 咁就嘥咗D時間:
上圖係我的野菜牛肉拌飯, 麻麻地好食, D野菜食落感覺似雪菜, 不過就冇雪菜咁咸. (我係最唔鐘意食雪菜架!!!)
呢個係朋友的拌飯, 辣八爪魚.
拿拿臨食完後, 就飛奔落去地鐵站, 由2號線行去5號線都好遠下 (雖然預咗但真係冇諗過咁遠), 之後就搭5號線去奧林匹克會場啦 (當時已經5點幾啦.......)
但去奧林匹克會場站, 途中係要轉站, 要喺江東站 (548) 落車, 之後要留意廣播, 要聽到廣播話下一班車係以馬川 (P555) 為總站先啱! (但後來聽其他VIP講, 可以喺5號線直接去到會場, 唔使落車再等下一班車! 不過我諗要撞啱搭果班車係馬川站就係囉......)
咁我地就係江東站落車, 原地等下一班車, 途中我問一個阿質斯, 問佢去會場係咪等下班車, 佢都算好人, 用D唔多正的英文答我, 話由江東搭2個站就去到會場, 下一班車應該啱! 但我唔敢肯定佢有冇答錯我......
就喺度唔知點時, 俾我見到一對情侶, 男係外國人, 女唔知係咪韓國人, 我就立即問果個女仔 (既然拍得拖, 實識英文啦), 個女仔好好人, 佢以為我地係日本人, 就用日文問我, 我答我係香港人, 佢就即刻用國語問: "你地係咪睇BIGSHOW?" 我話係呀, 佢就話佢地都係去睇 (咁我個心都定D......) , 跟住有廣播, 但我掛住問佢野, 不過呢個女仔可以一心二用, 佢提我: 而家個廣播話下一班車總站係馬川, 即係可以上車啦!
當時除咗呢對情侶外, 仲有幾個外國女仔, 一睇就知又係去睇BIGBANG啦!!!
去到奧林匹克會場站時, 已經唔使知有冇行錯路, 原來仲有成班韓國妹妹仔又係遲咗, 佢地行邊我地就跟住佢地就包冇錯! (不過我地未去過, 時間預唔啱就話啫, 仲唔到班韓國妹妹仔都會遲到喎???)
去到3號出口後, 仲要行一大段路先到達會場, 原來會場附近有幾間食肆架, 早知一早黎到喺度食啦!!! 我同朋友又行又跑咁先到達會場, 不過可能遲咗的關係啦, 佢地冇check我地個袋, 只係不斷催我地快D入場!!!
我同朋友係坐3樓, 30區98及99位, 其實都望唔真佢地架, 不過就好彩唔係山頂位囉, 不過入到去時已經係6:15pm啦......就喺我地搵到位時, 俾張飛VIP睇, 先知原來有人坐咗我地個位, 後來果2個VIP叫果2個人走啦......
因為之前已知話唔可以影相同拍片, 所以我地都好專心咁睇show!!! 成場show都好精彩, 絕無冷場!!! 仲encore咗2-3次添!!!
雖然遲咗入場, 但都睇得好開心!!! (其實我抱住睇一次就夠的心態去睇的, 始終唔知以後會點架嘛......) [當然我希望仲有機會去睇]
完場時都係8點幾咋, 去到地鐵站時好多VIP一齊, 又係......跟住佢地行就得架啦.......
沒有留言:
張貼留言
注意：只有此網誌的成員可以留言。