33.8 kg

上次韓國之行 (Sep 2010)，當時因為係跟團，自己又攞個細喼，雖然買咗手信，回程都係12kg (加上當時仲係夏天尾，d衫帶多幾件都好輕)

不過今次因為係3月份去，韓國果邊仲係冬天，每日的氣溫都係徘徊喺零下1-2度至10度左右，所以要著羽絨，仲要著冷衫，衛衣等等，所以出發時已經係14.5kg (自由行的行李限制係20kg一個人)

當時我都同朋友講，而家已經係14kg (朋友出發時都係14kg左右)，咁回程時會唔會超重???

不過今次我都限住自己買野，護膚品都只係買咗幾枝，仲有喺仁寺洞幫媽媽買的散紙包，2本雜誌 (好薄)，2隻BIGBANG CD，2本朋友託我地買的韓文書 (呢2本就厚少少，加埋又有2小本書，即總共4本書)，喺明洞買咗1個手袋 (好扁下)，仲有上司託我買的紫菜3大包 (雖然d紫菜好輕，但因為佢本身pack得好大包)

你地睇下, 包紫菜都大包架!!!

可能因為呢d野，加埋自己的私人野啦，我都feel都好重咁，回程時我不斷同朋友講﹕”死啦，如果超重點算呢? 實會罰錢個喎!!!”

而朋友就喺樂天免稅店買咗少少護膚品 (係雪花秀同"后", 都係幾枝, 不過就有個盒裝住，咁又有d重量)，另外佢亦幫佢媽媽買咗6盒膏貼，但因為佢拎唔到重野，而且旅行最後2日朋友病咗，所以佢都冇買好多﹔而我自己唔係唔想幫佢，但我個喼都放到滿哂……所以最後佢將膏貼另外寄倉。

結果……到回程時，朋友個喼係18kg左右，而我果個……33.8kg!!! 我都嚇咗一跳!!! 心想﹕好彩自己唔係買咗好多野咋!!!

我就同朋友講唔知會唔會罰錢?! (因為每人20kg，我就超重咗咁多，罰錢係每公斤US$100，如果我真係要罰錢，都好甘下……)

但本身我地事先冇劃位，我朋友問地勤可唔可以編埋一齊坐，個地勤話唔得，因為班機本身好full，所以一定要分開坐……

不過睇得出個地勤都盡力想幫我地一齊坐，佢都搞咗好耐，皺哂眉頭 (當時我個喼已經擺咗上去架啦)，我一路驚一路睇下佢會唔會要我罰錢，但最後……佢冇出聲，照樣俾我寄倉!

(而家諗番轉頭，真係抹一額汗呀，可能地勤掛住睇有冇相連位，而唔記得罰我錢啦……)

可能朋友個喼唔過20kg，所以我果個加埋落去就唔使罰 (但係咪2個人加埋所以唔使罰呢? 我都唔係好清楚)