N首爾塔+Teddy Bear Museum

旅程第2日 (3月5日), 我同朋友去N首爾塔+Teddy Bear Museum.

我之前已經搵好哂路線, 點樣去N首爾塔:

巴士﹕黃色巴士2號線

忠武路地鐵站 (3號 / 4號線) 2號出口直行一會兒，

車程約15分鐘，落車後要行一段斜路

黃色巴士3號線

梨泰院地鐵站 (6號線) 4號出口，車程約15分鐘

纜車﹕

明洞地鐵站 (4號線) 3號出口Pacific Hotel，步行10分鐘可上到纜車

不過, 朋友之前已經去過架啦, 旨在陪我去. 朝頭早食咗早餐後, 就諗住搭巴士, 當時都好凍下呀, 又大風......
我朋友喺明洞一路行, 行到去世宗酒店附近, 仲話好似唔同咗咁?! 當時我已經俾D風吹到唔知點咁, 一味跟佢行......
(諗番轉頭, 應該唔跟朋友咁樣行, 因為我有搵到資料嘛!!! 不過當時唔知點解冇咁樣做.......)

結果, 我地走去搭的士. 的士司機同我地講, 去到個閘口要show本護照俾閘口的人睇, 仲要好似俾錢個閘口的人 (幾多錢唔記得), 咁閘口先可以俾架的士繼續上去南山.

上到去, 仲要行一大段斜路先正式去到N首爾塔.

 

當時D風已經四面八方咁吹架啦.......

去到啦!!!

 






睇完之後, 我地就去Teddy Bear Museum, 佢有2個展館嘅. 第1個展館係用熊仔介紹以前韓國的歷史, 第2個展館係介紹而家的韓國. 朋友去過第1個, 但冇去過第2個展館.

如果一次過睇N首爾塔同熊仔的話就平D, 每人14000won.

第1個展館:

第2個展館:

之後我地就去N首爾塔啦~~~去到時, 有專人叫我地影張相, 背後係藍色畫布, 出黎效果係日同夜的N首爾塔為背景, 都唔錯.

我仲買咗自己生日日子的生日熊同埋有磁石的熊仔 (生日熊 4000 won, 磁石熊 4300won).

而朋友就去影相, 其實冇咩特別, 特別在於睇佢部電視, 睇住佢完成時, 係用畫筆一筆一筆咁將朋友頭先影的相描繪出黎, 6000won一張, 又可以整個相框, 當然個相框另計啦~~~

睇完之後諗住搭纜車落番去啦, 行一段樓梯先到 (當時我已經俾風吹到有D頂唔順......)

點知去到問職員, 佢地話因為強風關係所以唔開!!! 叫我地一係搭巴士 (但要行番上去, 我又唔係幾想, 因為佢D樓梯唔係段段都有扶手) 但早知係咁我寧願行番上去搭巴士, 點解呢???

因為最後我地徒步由山頂行樓梯行番落地面囉!!! 足足行咗成半個鐘有多 (或者唔至添......) 當時D強風又係四面八方吹埋黎, 冇遮冇掩, 行又唔係, 唔行又唔係, 朋友行得快過我, 我當時一路行, 一路俾強風撲面, 已經個人唔知點咁, 加上雖然天氣好凍, 但係因為行緊落去都叫做有郁動, 一路行果條頸同個人已經成身汗!!! 我真係覺得有D辛苦, 朋友雖然冇講咩野, 但佢已經認為我唔捱得!!!

我本身又有少少畏高, 唯有行下抖下, 都好索氣, 仲要抖大氣...... 佢D樓梯有D用木整成, 有D係石梯黎嘅, 但係又唔係段段有扶手......行咗好耐, 終於番到地面, 拿拿臨搭的士番酒店休息!!! (喺的士度我立即抹汗, 因為一冷一熱驚攝親, 但最後我地都病咗......)

不過我死唔去都算好彩, 因為早幾日睇到單新聞, 話有個男人去柴灣天主教墳場拜山, 但個墳喺山頂, 個男人行咗百幾級樓梯後就猝死咗!!! 我睇完後就諗, 我由山頂行落山腳, 雖然索哂氣, 但好彩仲有條命, 仲未死得!!!http://the-sun.on.cc/cnt/news/20120319/00407_060.html?pubdate=20120319


返到黎香港後, 同上司傾開 (佢都去過韓國玩), 原來佢都試過由山頂行樓梯落山腳, 當佢聽到我咁講時, 佢即刻話: 好甘架喎!!! (我上司係男人), 連男人都話甘, 何況我係一個女仔呢???