韓國之旅 (17 Sep 2015): 南山塔, 北村韓屋村, 新村, 梨花女子大學, 東大門, 市廳

17 Sep 2015

第二日個團會去南山塔, 北村韓屋村, 東大門

但韓國當地的導遊 (其實係香港人), 佢睇過康X的時間表後, 覺得怪怪地咁, 所以就問我地不如加多3個景點行下, 又自費多3餐 (每人64000 won), 咁好多人都同意, 咁佢就喺呢日加多咗去新村同梨大.

首先去南山塔 (N Seoul Tower) 先, 我第二次去韓國時已經去過, 當時又凍又大風, 最後病咗...但亦無損我今次再去的心情~

 旅遊巴載到我地去斜路後, 就要自己行上去, 我就慢慢行上去, 朝頭早D空氣真係好清新呀~~~




































而登上南山塔就要自費, 要9000won, 不過我冇上去~ 雖然當日好曬, 但又好大風呀!!! 影自拍都好難呀, 俾風吹到D頭髮!!! 不過雖然早, 但都有好多人去南山塔, 好多韓國中學生~~~

不過估唔到9月會開始有紅葉喎!!! 其實我從未見過紅葉, 咁難得喺南山見到, 當然要影低啦!!!

導遊話行一個鐘度就要落山, 咁我就慢慢行返落去啦~

我地約定喺山腳下的CU等, 我見到有Line的凍飲呀~~~

之後就去北村韓屋村啦~

 呢個團的好處係, 導遊唔會好似其他團咁, 拎住枝旗仔, 帶大家去呢邊去果邊, 呢兩個導遊反而係叫我地: 大家認住呢度, 我地會預大家行1個鐘 (或2個鐘等等), 咁大約幾點幾點, 我地就喺呢度等大家上返旅遊巴.

所以我今次係好free咁周圍行, 夠鐘就行返去約定地點等導遊同其他團友.

但係就喺北村, 有個插曲發生咗, 有個74歲的阿伯喺北村唔見咗!!! 呢個阿伯亦係一個人黎韓國玩, 聽韓國導遊講, 話呢個阿伯喺40年前黎過韓國, 仲話果時有"殘廢餐"喎! 今次係佢個仔出錢請阿伯去旅行, 咁佢又過黎行下喎~~~ (我諗阿伯唔係以為今時今日韓國仲有"殘廢餐"呀!!!)

到咗約定時間, 所有團友都齊哂, 只係爭阿伯, 當然兩個導遊就好緊張啦, 咁康X導遊就留低繼續搵阿伯, 而韓國導遊就唯有一個人照顧哂我地咁多個, 於是就帶咗我地去新村火車站附近食三層肉 (呢餐係另加, 自費)

後來有雞肉添, 好好味呀~~~

之後導遊帶我地去新村同梨大行街, 不過行得2個鐘度......(呢個景點係韓國導遊自己加落去)

我相信個個都影過呢隻高跟鞋, 但其實我係第一次見到咋......喺呢度我幫同事買到Laneige同Nature Republic~

之後成個下午而夜晚就行東大門啦!!!  你地冇睇錯, 係由大約3pm - 7:30pm行東大門!!!

而香港導遊繼續搵阿伯, 咁韓國導遊就同我地講行邊度邊度多衫賣...但我冇咩點行, 連睇DDP玫瑰花著燈都冇睇, 因為又約咗韓國朋友A先生...所以只係影咗DDP外圍就算......

之後我就行咗一陣Lotte Fitin, 之後搭地鐵返酒店抖下~ 然後再去明洞會合A先生~

佢就帶我去食水冷麵, 舖頭喺忠武路附近~~

雖然A先生幫我叫咗唔辣, 但最後都係有加辣醬落去......但可能因為有冰喺裡面, 所以減少咗D辣味啦~~~

之後佢帶我去市廳, 喺途中佢見到有炒栗子的檔口, 問我食唔食栗子? 我又未食過韓國栗子, 咁就買包細的試下啦~ (但我冇留意幾錢)

原來佢地都係連殼炒, 但買果時就會幫你去埋殼 (可惜我冇影相, 因為一路行去市廳, 而且A先生亦行得好快, 要追住佢先得!!)

雖然D栗子好大粒, 而且仲熱, 但可惜冇香港的炒栗子咁甜, 即係韓國栗子唔係太甜, 可以話近乎冇咩味......而且栗子肉的顏色唔同香港栗子, 韓國栗子肉熟咗的顏色, 同生的冇咩分別, 即係都係白雪雪, 只係好小好小的黃色......同埋食落去覺得有D粉粉地......

終於我地去到市廳啦, 咁啱有個免費音樂會喎, 大家就一齊去聽音樂啦~~~

雖然聽咗一首歌, 但有D風吹埋黎好舒服呀~ 而且其他韓國人冇叫囂, 靜心咁去欣賞音樂會, 呢點好值得欣賞~

之後我地夜遊咗少少清溪川同光化門~

之後佢就送我返酒店休息啦~  


後來聽同房的女團友傾開, 阿伯終於喺7點幾自己返酒店 (原來阿伯係同香港導遊share一間房), 香港導遊原來喺成個下午, 先喺北村等咗2個鐘, 而韓國導遊就每隔一個鐘頭, 打去警局, 醫院, 同我地住的酒店, 睇下有冇阿伯的蹤影......當然係冇啦......

後來香港導遊就返酒店大堂等阿伯, 當然又係冇影啦, 之後又再去過北村等阿伯......後來香港導遊返酒店, 打電話俾香港康X匯報返呢件事...正當香港導遊喺酒店房打算打電話俾阿伯個女, 話佢知老豆唔見咗果時, 房門突然之間"嘟"一聲, 原來係阿伯出現, 佢仲拎住幾個水蜜桃添......你話死唔死吖???

之後香港導遊當然鬆一口氣啦, 問阿伯去咗邊, 阿伯話佢喺北村迷咗路, 仲話去返集合地點果時已經唔見咗我們, 諗住"你地都唔會等我架啦, 咁我咪自己周圍行囉", 而出發前香港導遊就每個團友派發一份資料, 係有香港同韓國導遊的韓國電話 (韓文及英文版本), 以便發生咩事都可以聯絡.

咁香港導遊問阿伯, 點解你唔打電話俾我地呀? 我地好擔心你呀! 點知阿伯話: 我唔識打電話呀!!! 香港導遊話: 咁你可以將張資料俾韓國人, 佢地會幫你架嘛! 阿伯話: 我唔知呀, 我唔識呀!!!

咁你話, 呢D咪叫做"恃老賣老"囉, 皇帝唔急太監急......不知所謂, 明知全團人都擔心佢, 佢仲悠閒到走去買水密桃囉!!!