韓國之旅 (19 Sep 2015): 南怡島, 廣藏市場

19 Sep 2015

今日係自由活動 (本身個團係plan咗今日係自由活動), 所以我一早約咗韓國朋友B先生, 佢話想帶我去首爾近郊, 咁我話不如去南怡島啦 (其實我未去過), 原來B先生都未去過喎, 於是佢就揸車黎酒店接我~

沿路上都有好多車入去南怡島, 所以都有D塞車 (加上我地差不多10幾先由酒店出發), 所以都差不多用咗成個幾鐘頭先去到南怡島附近......

沿途上風景好靚呀, 空氣好清新~

最攪笑的係, B先生將架車駛去自助洗車的地方, 佢本來想去自助洗車果度洗車, 點知機器壞咗, 於是佢叫我坐喺車裡面, 佢自己一個人洗車~

之後就搵位泊車, 泊好後就去食lunch先~

 我食炸醬麵

B先生食呢個辣海鮮麵~

之後我地再行過去搭船去南怡島, 途中見到有人喺度玩"笨豬跳"呀~~~

準備上船啦~

好多人喺隻船度呀, 其實我本身有D暈船浪, 不過呢隻船揸得好定呀!!!

因為係星期六, 所以除咗遊客, 仲有好多韓國人一家大細去野餐, 又有情侶去玩~~~ 我地行行下, 突然有韓國小朋友對住棵樹大嗌, 咁我望下啦, 原來有松鼠喺樹上面呀!!!

 好可愛呀~  唔怪得D小朋友係咁嗌啦!!!

之後大約3點幾, 我地就搭船返去攞返架車, 之後B先生只係車到我去往十里地鐵站, 因為佢咁啱喺果度有D野做, 而且我又約咗另一個韓國朋友D先生, 所以我喺往十里搭返地鐵返酒店 (因為行南怡島果度好多沙, 所以順便返去換另一條褲)

之後同D先生見面, 佢問我想去邊, 我話不如去廣藏市場吖, 因為想試下綠豆煎餅, 咁佢話OK於是就搭地鐵, 去到鐘路3街站落車, 打算行路去廣藏市場......

但因為D先生喺學生時代成日去鐘路, 反而出黎做野後就好少去, 所以佢都唔多識行, 佢仲講笑話佢都係遊客, 後來佢睇地圖再帶我行, 終於都到咗啦~

因為係放工時間, 檔檔都好多人, 而且油煙味都幾大下......

之後D先生帶我食咸的紅豆粥~

裡面有年糕粒, 有D咬口~ 之前聽好多人講話咸的紅豆粥唔好食, 我終於領教到啦......其實唔係太咸, 但因為香港人都慣咗食甜的紅豆沙, 咁我同D先生解釋, 佢都忍唔住笑, 之後佢就叫咗個甜的紅豆刨冰俾我XDDD

食完之後D先生繼續搵位去食綠豆煎餅 (因為檔檔都冇咩位)

後來終於搵到, 而且仲叫咗個套餐係有綠豆煎餅同豬肉煎餅, 味道都OK喎!!!

之後D先生仲想帶我去梨泰院, 不過因為我真係好攰, 否則都會跟佢去睇下, 咁佢話係喎, 你朝早去咗南怡島, 一定行咗好多路, 我都覺得唔好意思~

後來佢就帶我去鐘路的年輕之街行下, 之後佢就同我搭的士返酒店, 我話唔使啦, 我搭地鐵得架啦, 佢話唔好, 你行咗咁多路, 唔好搭地鐵啦~

結果返到酒店沖涼後, 我攰到即刻瞓著咗......

不過我覺得行廣藏市場一次就夠, 因為有好多檔都煎餅又煎魚, 搞到我一身油煙味呀......