今日全日我係離團, 冇跟大隊, 因為我約咗韓國朋友C小姐, 佢本身結咗婚, 仲有個仔, 為咗就佢的時間, 所以我今日上午就約佢見面, 因為之前我話想試下韓國豬腳, 但其實C小姐本身好少食, 但佢見我飛黎韓國玩兼探佢, 所以佢上網搵下有邊間豬腳好食......
其實我知市廳果邊有得食 (諗住就C小姐的屋企), 但最後C小姐問我去過新沙未? 佢話新沙有豬腳食~ 我話未去過, 但我話同你屋企有D遠喎? C小姐話冇問題, 於是我地就約咗喺新沙地鐵站8號出口等~
出到去見到C小姐, 大家都好開心, 於是一路行一路傾偈~ 可能仲早啦, 都唔係太多人~
佢問我肚餓未? 肚餓就先去食豬腳先再行下, 但我話暫時唔肚餓, 於是我地兩個慢慢行林蔭大道, 途中見到Kakao Talk Friends~
之後就見到新沙的Line Friends Store啦!!! 其實我今次都plan咗想去架!!! C小姐雖然都有用Line, 但佢完全唔知有呢間野, 所以我地見到都好興奮, 入去瘋狂影相!!! 亦因為仲係朝頭早, 唔係太多遊客, 所以影相影得比較輕鬆~
咁啱佢做緊mega sale, 咁我想買佢地出的膠水樽, 可惜已經冇貨啦......而C小姐諗住買件T-shirt俾個仔, 點知因為佢個仔比同齡的小朋友高大, 所以冇佢size, C小姐有D失望~ 之後我地就去食豬腳啦~
佢係喺網上搵到嘅, 入到去冇咩人, 因為時間仲早......之後我地叫咗細的豬腳, 阿豬媽上咗D前菜同個湯~
呢個湯係有豆腐同芽菜, 但原來係辣架!!! C小姐當然覺得好味啦, 但我飲咗幾啖就放棄咗......
之後仲上埋呢D前菜, 仲有濕毛巾, 原來係俾我地食完豬腳後抹手的~
終於豬腳黎咗啦!!! 我地都驚食唔哂, 唯有食下抖下傾下偈咁~
今次我亦嘗試用芝麻葉包豬腳食, 但芝麻葉的味道......真係唔係個個都頂得順!!! 最後我用生菜包黎食, 或者就咁食豬腳就算!!! D豬腳好好味, 一D羶味都冇~~~
食完之後C小姐提議不如去飲咖啡, 我話好, 於是行去附近的Mango Six啦~
坐咗一陣之後, C小姐就差不多返屋企湊仔, 所以我地行落地鐵站, 臨走果陣佢仲依依不捨呢~
與此同時, 韓國朋友A先生問我喺邊? 我話喺新沙, 佢話等佢收工後, 不如去高速巴士客運站同江南啦, 佢話喺高速巴士客運站1號出口等~ 我話OK, 於是我又返酒店抖下先~
抖夠後我就去搭地鐵, 因為高速巴士客運站除咗有長途巴士去韓國各地之外, 亦係3, 7, 9號地鐵線的交匯點, 而佢亦有一個超大型的地下街"Go To Mall", 所以我轉線去7號線, 去到高速巴士客運站時, 因為已經差不多係放工時間, D人已經開始多, 我又驚遲到, 我都行得好快, 搞到我成身汗......
而且一出閘係未到1號出口, 站內雖然有指示牌教人點行, 但因為放工D人越來越多, 加上果度的地下街又有好多人, 所以我都好心急......
結果行咗差不多10分鐘度, 終於俾我搵到個1號出口啦......
之後見到A先生啦......我同佢講我都唔肯定呢個係咪1號出口架, 佢話你搵啱咗啦~
佢話佢頭先去咗江南整牙, 所以就約我喺度見面, 我話冇問題吖~ 於是我地入咗去客運站裡面, 裡面有好多食店, 於是我地去到間餐廳食野啦~
佢叫咗個雪濃湯, 我叫咗個年糕餃子湯~
食完之後可能佢唔夠飽, 趁我去洗手間時, 佢去咗Lotteria買咗個套餐, 仲請我食薯條添~
之後我地由客運站行路落去江南果邊, 其實真係好遠......真係用咗我好多腳骨力......我今次黎韓國, 行路仲行得多過喺香港架!!!
之後去到江南果邊, 佢問我想行去邊, 咁我話不如睇戲啦, 佢話要搵套西片睇先得, 但我話韓國電影都得架, 雖然冇英文字幕, 但都冇問題啦~ 於是我地去CGV睇下有咩戲~
但因為係星期五晚, 戲院好多人, 而且就算想睇亦肯定睇唔哂套戲 (因為我要就時間返酒店), 最後亦放棄咗~
咁A先生話不如食刨冰? 我話好, 於是就落樓下食刨冰~
食完後A先生帶我搭巴士去新沙, 等我轉地鐵可以容易D返酒店, 今次亦係我第一次搭韓國巴士呢, 冇人帶住始終唔夠膽, 因為有D巴士只得韓文廣播, 但今次佢帶我搭呢條巴士就有韓英語廣播, 之後我同A先生搭地鐵, 只係大家唔同線, 我返酒店佢返屋企~
沒有留言:
張貼留言
注意：只有此網誌的成員可以留言。