因為尋日行咗好多好多路, 所以今朝係瞓到唔願起身......
其實今日我都想離團, 因為又係要去"護肝寶"聽野......(跟過團都知, 一定要去人參店, 韓國化粧品店同護肝寶架啦, 好彩人參店同化粧品店喺18號去咗 [我果日離團所以唔使去hahaha] ) 雖然導遊話可以離團, 但要我自己夾返時間搭機場巴士去機場join返佢地, 結果無奈地跟住佢地......
我一上旅遊巴就忍唔住瞓著咗......直至去到麻浦區的護肝寶先落車......去到已經有好多香港, 大陸團齊齊入去聽野......而且同我第一次去跟團時, 個地點好似唔同咗? 原來聽返果度D員工講, 原來護肝寶已經搬咗黎麻浦一段日子, 仲要係自置物業......之後聽一大輪介紹護肝寶點好點好......可惜冇椅坐, 因為我對眼完全睜唔大, 只能夠開淨一條線......想瞓又瞓唔到......真係被迫要我聽......所以呢part係冇影相......
之後上返旅遊巴, 去到另一個自費景點: 麻浦農水產品市場, 因為韓國導遊知道就黎過中秋, 就帶我地去買又平又靚的生果~
一落車就離遠見到麻浦的"首爾世界杯體育場"~
之後行過D就會見到麻浦農水產品市場~
雖然係星期日的上午, 但都見到有D韓國人揸車過黎買生果同海產~
而市場裡面人唔多, 所以都可以消磨下時間~
我去買咗杯甜米露 (其實都係想醒神一下)
佢呢度除咗賣蔬菜生果之外, 裡面仲有個超級市場同埋海鮮檔, 超市我有行, 海鮮檔就冇乜點行, 因為地下太濕啦~
之後就去咗食自助餐 (自費), 但實在冇咩特別, 香港D自助餐仲好過佢.....D蟹唔多新鮮, D蝦又冇咩味......都唔知個韓國導遊點揀......
之後就去明洞啦, 但其實應該係18號去, 但韓國導遊就將明洞編去今日, 咁都算啦, 佢竟然只俾我地喺明洞個半鐘去買野!!! 個半鐘呀!!! 唔係三個鐘呀!!! 唔係呀...... 搞到好多團友都好唔滿意......
都唔知呢個韓國導遊點編排, 17號果日就安排我地去東大門就4個半鐘 (我之後離團所以唔知)......好多團友都話應該D時間調返轉就會好D......
之後有D團友就跟導遊去樂天Duty Free買野......有D就自由喺明洞活動......
我就去咗明洞新開的Hello Kitty Cafe坐下, 因為實在太攰啦......
呢間分店比弘大同新村細, 冇法啦, 呢度係樓上舖, 而且明洞租貴嘛~
坐到咁上下, 就去明洞大街買野睇野, 買咗skinfood同BIGBANG月曆~
本來仲去埋Etude House買佢新出的眼貼, 但佢竟然係3盒一pack黎賣!!!
我問sales冇一盒一盒咁賣咩? 佢話冇, 要買一定要3盒一pack咁買......唉......
價錢我OK, 但我驚超重 (因為濟州航空好嚴格, 寄倉行李超重1kg都要罰錢, 每公斤罰8000 won), 所以我忍痛冇買到......
之後去Olive Young睇野, 有Kakao friends精品啊~
因為導遊約咗我地喺明洞樂天Young Plaza等, 所以又去果度的Line Friends Store啦~
之後就出機場啦~
但韓國導遊喺差不多去到仁川機場時, 又帶我地去仁川的土產店, 睇下有冇野啱我地買......裡面除咗sales, 就只得我地, 場面冷清......裡面有零食啦, 日用品啦, 乜都有, 講真, 要買都唔喺呢度買啦......
全部人混咗一陣吉, 又上返車去仁川機場.....真係多鬼餘......
去到機場, 導遊交帶D野後, 好多團友都要再執一執D行李 (我都唔例外, 因為驚超重), 我仲問導遊有冇磅行李的磅? 佢帶我去, 有個自助行李磅, 但部機冇開......後來我去問濟州航空D地勤, 佢叫我喺返濟州的櫃位榜下......
好彩, 冇超重, 仲爭2公斤先夠15公斤......我都鬆一口氣.....因為我都pack咗好多野落hand carry度嘛!!! (早知就買多D paper mask啦!!!)
之後就要去攪退稅......其實我都係第一次攪退稅......如果有留意韓國新聞的話, 都知道而家韓國簡化退稅, 有自助退稅機, 我地去果時有專人幫我地, 所以都好順利攞到錢......不過就有D大陸人就擺明打尖囉!!!
之後到入閘時, 又有成班大陸人又打尖!!! 其實佢地應該唔識嘅, 不過佢地見到"同鄉", 緊係"唔執輸"企埋D同鄉度啦!!!
入閘後見到機場裡面的"免費體驗", 就想去玩下, 點知去到D女仔喺度抹野, 又冇人招待我地, 只係眼望望, 後來要我開口問, 個女仔先施施然話"今日的免費體驗已經完咗啦"......唉, 要客人問你你先答.....而門口又冇時間show出黎, 搞到我地有D失望......
之後等入閘啦......
之後就上機啦, 唔想咁快走呀.......
返到黎香港機場已經係12:35am......之後等行李, 等通宵巴...再轉的士返屋企, 已經差不多3am, 梳洗後要4am先瞓覺......
沒有留言:
張貼留言
注意：只有此網誌的成員可以留言。