明洞餃子+明洞Daiso

我將最後2日 (3月8日及9日) 行程一齊寫, 因為朋友病咗, 冇乜點行街, 就算行, 都係大家出去食飯, 行街就我自己一個.

雖然係咁, 但朋友唔知點解, 8號果日突然話想行景福宮, 又話想行狎鷗亭 (其實呢2度都唔係我的行程範圍之內), 可能佢知我未去過呢2度啦, 問我想唔想行, 我原本都冇話好想去呢2度, 而且朋友越咳越勁, 我就話唔好啦, 你病成咁仲要行? 我心諗: 景福宮果度好空曠, 實會好大風, 你加重病情, 又會唔會賴落我度呢???

而且景福宮只係影下相, 都冇咩好行, 但朋友果日真係唔知點解, 感覺到佢好似好想行咁?! 我極力話唔好行啦, 你喺度抖下仲好啦, 我自己一個喺附近行下囉, 咁佢喺無奈 (?) or失望 (?) 之下就瞓覺......我就用呢D時間去番樂天star avenue, 影番尋晚影唔到的相.




之後朋友話出去食飯, 咁啱之前我喺明洞見到著紅色衫的大使, 問咗佢地攞咗份中文的明洞地圖, 佢就叫我睇下有咩啱食. 我睇咗好耐, 烤肉, 炸野, 拌飯果D......朋友應該都唔啱食 (加上佢病咗, 更加冇理由食炸野同烤肉架!!!) 我最後揀咗明洞餃子, 心諗應該都啱食啩, 之後同佢講, 佢冇異議, 咁就行去食.

去到後發現好多人排緊隊, 我問朋友食過未, 佢話未, 不過就知好多人食過.

坐低後我地叫咗上圖的餃子麵2份, 除咗餃子麵外, 佢只有得好似平時酒樓有的糯米包咁嘅款的饅頭, 另外仲有一款好似辣的麵 (唔多記得), 仲有一款豆漿冷麵, 朋友想叫冷麵, 但阿豬媽話得4-10月先有得食, 咁先至叫埋同一款麵. 之後阿豬媽就叫我地俾咗錢先, 之後等咗一陣就有得食. 而阿豬媽仲俾咗2排香口膠我地, 可能用來辟口氣!

一食落去, 都可以接受, D餃子係豬肉餡, 但D麵條就好淋, 近乎係淋得滯!!! 朋友食咗幾啖就話唔食啦, 因為佢嫌D麵太過淋, 食唔到! 但可能當時我肚餓啦, 所以都差唔多食哂! 後來朋友將張相擺上fb, 點知我地大家識得的朋友都話, 明洞餃子係最難食架喎, 仲話雖然D旅遊書多數都會介紹, 但係真係唔好去喎!!! 不過朋友冇話我D乜, 因為我事先問過佢嘛, 我唔問過佢就話啫!!!

之後朋友話再去樂天超市買野食返酒店食, 就買咗下圖的食物: 中間的係三文魚壽司 (佢當晚飯架啦 - 不過我當時話, 你感冒喎, 食生冷野會唔會唔係太好呀? 佢話冇問題, 咁你話得就得啦!)

左邊的係2件士多啤梨蛋糕 (果度有個counter d蛋糕好靚, 但因為得韓文, 冇英文, 有D都唔知咩餡, 好難估, 但呢款裡面的餡都係士多啤梨, 穩陣呀, 所以就買呢款, 味道都OK); 右邊的係18粒士多啤梨, 11000 won, 粒粒都好甜呀, 一D酸味都冇!!! (其實朋友冇諗住買生果, 佢係突然之間醒起問我前一日果串士多啤梨好唔好食, 我話OK, 咁佢先買)

 















買完野後朋友返酒店休息, 我就自己一個喺明洞周圍行, 不過我都傷風, 所以都冇去好遠的地方......

我去咗明洞M Plaza的地庫 - Konesy行下, 佢喺梨大都有分店, 呢間專賣家品, 文具等, 不過冇收獲; 而1樓至3樓係Zara, 而4樓就係我另一間想行的店舖: Daiso.

呢間Daiso就好似日本果d 10蚊店咁, 不過呢度就係1000 won起, 呢度又係乜都有得賣, 我就買咗2對筷子:

每對都係1000 won, 抵到爛呀!!! 喺香港邊度會有咁平的筷子呀??? 不過一入到去D暖氣好鬼死勁, 一定要除褸及頸巾! 我仲見到有個兵哥買野添~~~ 不過喺Daiso買野要膠袋的話, 係要收20 won一個膠袋架!!!

另外我去護膚品店買野, 不過冇影相, 因為冇乜心情, 加上病......

至於夜晚果餐, 我去明洞樂天超市裡面的麵包舖買麵包食 (因為唔知食乜), 睇下係咪真係如朋友所講, 得Paris Baguette的麵包最好食! 食完之後, 我唔覺好難食喎, 又唔係唔入得口喎 (冇影相, 因為冇心情), 但係咪最好味就當然唔係啦!!!

我唔似得我個朋友咁, 要食好住好, 咁又係嘅, 佢一生人都冇乜點捱過苦, 唔同我呀, 不過佢呢D"嬌生慣養"的人, 又點會明白吖?

不過對我黎講, 好嘅又一餐, 唔好嘅又一餐吖, 係咪?

另外我再去明洞地下街買CD, 買咗BIGBANG CD:

呢個鐵盒封面, 而家已經生咗D鏽漬啦, 唔關我事喎, 個個有買的都話有生鏽, 後來YG話係特別效果喎, 俾佢吹脹!!!

我淨係買咗TOP封面咋, 原本想買埋BIGBANG封面, 但太重啦, 最後放棄!!!

新碟海報 (但其實呢個look真係麻麻地......)

BIGBANG mini 4 album, 原本可以同隻新碟一齊買, 但我以為冇帶張紙出黎俾老闆睇 (後來先知有帶喺身) 加上老闆話冇貨, 就叫我第2日再黎睇過! 第2日我再去俾老闆睇隻碟個樣, 老闆就去對面間碟舖搵, 終於都有貨啦, 真開心!!!

而且張YG family card係TOP添~~~

下圖的2本雜誌 Asia TV, 係喺南山塔裡面的紀念品店買, 每本11800 won.  左邊的係2011年3月, 右邊的2012年3月. (封面)

(封底) 左邊係2011年3月 (FILA已經唔係佢地代言啦, 係Beast), 右邊的係2012年3月, 係TOP做代言的FUBU.

到最後一日 (3月9日), 我地要離開韓國啦, pack好行李後, 就去樂天百貨, 同埋樂天young plaza消磨時間.  樂天young plaza裡面有Uniqlo~~~

後來又再落去food court食野, 今次試咗間日本野, 有2個師傅整野食, 主要食烏冬, 炒物, 鐵版燒等. 我叫咗個海鮮烏冬, 朋友就叫咗個雞肉炒烏冬 (冇影相), 不過我個烏冬可能漏咗單, 因為朋友個炒烏冬都黎咗好耐啦!!! 後來問阿豬媽, 咁個師傅先至執料整, 睇黎真係漏咗單......

食完後就返酒店坐咗陣, 坐到大約2點幾到就出去搭6015. (Ibis酒店有個好處, 就係門口有6015個站), 3pm左右就有車, 我地俾埋張減車費的coupon個司機就上車. 去到世宗酒店, 就有幾個香港人上車. 因為呢2, 3日都瞓得麻麻地, 加上傷風, 所以我都忍唔住瞓著咗......

機場The North Face內的太陽~~~

我地搭國泰機, 所以要落一層電梯落去......

因為朋友book機位時太忙, 唔記得劃位, 所以今次我地要分開坐. 我隔離果2個女仔都係香港人, 係跟永X旅行團返黎, 佢地仲手提D士多啤梨返黎添......

後記:

今次係第2次去韓國, 上次係走馬看花, 今次可以睇多d唔同的景點 (所有資料只有我一個人去搵), 雖然......最後都去唔到咁多......

雖然呢幾年不斷睇韓劇, 但始終冇正式學過韓文, 不過今次去到, 除咗喺明洞呢d遊客區, 可以用國語之外, 其餘我都係靠英文, 或者少少韓文單字, 再加身體語言, 哈, 又可以溝通到喎!!! 感覺d韓國人的英文, 好似好過我上次去少少 (上次問路時, 已經搵個後生女去問, 點知佢一聽英文就好驚青), 反而今次問路時, 無論係後生仔女, 定係阿質斯, 都講到少少英文, 當然亦有人同我講番韓文啦 (好彩我都識聽少少咋!)

不過, 頭3日都OK, 後3日就唔OK!!!

轉捩點就係南山塔, 之後仲有好多事, 例如: 大家都病咗啦, 朋友又有D牢騷 (詳情請睇之前我寫果幾篇blog), 加上我無意中知道咗D事, 令到後3日都玩得唔多開心......

亦令到我知道, 原來有幾位朋友係咁樣睇我, 我真係估唔到......喺我心目中, 果幾位朋友照計唔會咁樣講野, 亦應該唔會有咁嘅思想, 始終佢地人生經驗點都會多過我!!! 但冇諗過......呢幾位朋友會附和今次同我一齊去的朋友, 唉...... (咁又係嘅, 驚得罪咗今次同我去的朋友嘛!!! 而且我又"人微言輕"......)

我好失望......不過, 而家知道咗仲好啦, 睇清楚呢幾個人的真面目!!! 起碼知道原來佢地係有咁嘅思想, 用D咁嘅思想黎睇人!!!


(不過, 應該係話: 如果我肯將半個喼"讓"出黎, 俾朋友擺果6盒膏貼的話, 情況可能會改寫都未定嘅......咁點解你要喺行程中不斷暗示呢? 點解你唔大大方方, 喺出發之前問下我呢??? 可能你以為我會"識做"啦......, 但我都要買野喎? 咁可以點呢??? 係咪一樣野都唔好買, 淨係放膏貼呢???)