新村Hello Kitty Cafe + Paris Baguette

當日我地去唔成弘大的Hello Kitty Cafe, 於是改去新村果間.

去到新村地鐵站後, 一出黎見到大型商場U-Plex, 等升降機途中, 又俾我見到TOP.

出番黎地面後, 因為我唔記得咗帶地圖, 而朋友之前係去過, 所有唯有靠佢的記憶去搵啦......途中, 見到由2PM及T-ara代言的眼鏡舖Look Optical. (呢間眼鏡舖喺明洞都有分店架, 好近我地住的酒店 - Ibis明洞, 即係喺乙支路2號附近, 好近地下街的19號出口.)

我地行大路, 朋友開始記得番點行, 最後都搵得到Hello Kitty Cafe.

呢間cafe有2層, 地下近收銀果邊就擺咗呢個公仔, 但朋友話以前黎時唔係呢個公仔喎~~~

我地的餐: 左上角的熱朱古力及+右下角的朱古力香蕉窩夫係我的; 朋友的係左下角的窩夫加雪糕+右上角的熱茶 (終於有茶叫啦......)

(熱朱古力近鏡) 其實我唔多好香蕉, 純綷想食有朱古力醬的窩夫, 不過都有食咗少少香蕉......不過我地的窩夫佢焗得脆得滯, 好硬, 要俾D力先切得開, 不過真係好好食!!! (當然......係我切哂2份窩夫啦, 好在我都有D力, 否則又俾有錢人話我唔識做呢樣做果樣架啦......)

後來我地上2樓, 完全冇人, 所以任影唔嬲!!! 後來有對男女上黎, 原來2樓呢度有個吸煙區係露天嘅, 佢地就坐喺果度食煙......

食完野後, 我地返酒店抖下 (係呀, 又要抖呀......) 朋友話好鐘意食韓國有名的麵包店Paris Baguette (如果大家有睇過韓劇的話, 一定會聽過"麵包王金卓求"呢套高收視劇集, 個故事其實就係改編自呢間Paris Baguette主席的生平) 我話真係咁好食咩??? 佢話係呀, 仲話黎韓國只會買呢間的蛋糕同麵包, 其他果D麵包舖的出品, 簡直唔入得口咁話喎!!! (有冇咁誇張呀???)
佢話今次黎, 明洞唔見有分店, 所以佢喺新村見到, 就二話不說走入去, 最後買咗下圖的食物做消夜: 2個蛋撻, 3個泡芙, 1盒三文治. (下圖係朋友已經食咗D架啦, 個蛋撻我食咗一啖先記得影相......)

食完之後, 我覺得三文治OK啦, 泡芙我本身好少食, 都可以接受, 至於個蛋撻, 我真係唔覺得好好味喎, 撻皮係做得唔錯, 都夠脆, 但蛋心就唔係好香 (咁當然有蛋味啦), 但唔夠香港的蛋撻咁香囉, 當然, 佢的蛋撻唔係唔好食, 但有得揀, 我寧願食番香港果D囉......所以係咪真係如朋友所講係最好食的, 我唔敢評論......

不過, 問題又黎啦......佢買完以上的食物後, 我見到有skin food, 就叫佢等一等我, 我入去買野, 買完野後佢就有d面燶燶......後來先知, 原來佢好話我唔幫佢拎住袋食物......點解呢, 因為佢要幫佢的太太朋友, 去Tony Moly度買野, 咁拎住袋食物, 咪冇手攞護膚品囉!!!

我以為佢的太太朋友要買好多野啦, 點知佢話......太太朋友要Tony Moly的1枝foot cream囉!!! 吓, 1枝foot cream!!! 哦......咁又係嘅, 我又"唔醒目"囉, "唔識主動幫佢拎住袋食物", "袋食物好重架嘛", "我一D都唔識做囉", "朋友做唔慣粗重野", 呢D野當然要我黎拎啦, 可惜今次另外果位朋友冇黎吖, 果位朋友好主動幫朋友拎野架......

打後果幾日, 我咪主動問佢, 買咗野俾我拎啦 (縱然佢只係買一袋野), 佢可能估唔到啦, 次次都話唔使 (但後來佢開到聲叫我拎, 我可以唔拎咩??? 當然要拎啦, 否則又俾說話我聽架啦~~~呢D有錢人, 真係好有"小姐脾氣")

之後我提佢記得買foot cream, 佢可能"鬥氣"啦, 一味話遲D買都得......最後佢喺東大門買咗囉!

返到明洞後, 落去地下街買CD, 本來另一個朋友託我買電話繩同名牌, 1000won一個, 但去到後, 2間CD舖唔見有名牌, 雖然有好多款電話繩, 不過起碼都要3, 4000won一條, 後來果位朋友話唔使買啦, 太貴!!!

到夜晚啦, 朋友好想食人參雞湯, 因為我唔食得人參, 咁佢話睇下呢間有冇其他野食啦, 冇就我另外去食. 我地行到去新世界百貨對面, 有間叫"明洞參雞湯" (類似啦, 唔係好記得), 佢呢度除咗得參雞湯外, 就只有鮑魚粥食, 我地就叫咗呢2樣野.

不過個粥我覺得唔多好食, 好杰, 冇咩味道, 食到咁上下, 先發現裡面有1片人參, 另外1片我已經咬到爛哂先知......OMG!!! 我寧願食番香港D粥好過!!!

食完後, 見到呢間pizza店, 有我都幾like的澤演同Nichkhun哦~~~

不過, 可能同一日朋友食完2餐雞啦 (烈鳳及人參雞), 定係出入時一冷一熱的關係呢 (我地去果時, 所有商舖都有開暖氣), 朋友喺半夜就係咁咳, 咳到醒咗, 最後係感冒! 大家唔好以為我冇病呀, 可能又係一冷一熱又未定, 又可能係佢咳果時, 惹到我都未定; 喺佢病咗之後, 我就傷風啦......

(而家我寫呢篇野時, 已經病咗3次啦: 喺韓國時1次, 好番後隔2日又傷風, 再好番後隔2日又再傷風......而家好得七七八八, 希望唔好再病啦......)