我地由酒店出發, 搭2號線去到合井站, 再行15-20分鐘就會到. 好多鐘意BIGBANG及2NE1的fans都去過, 有D人可以由朝等到晚, 就係希望可以見到BIGBANG, 或者2NE1一面 (不過真係要睇運氣, 有D人要等到好夜先可以見到一面)
我同朋友講, 唔會等佢地, 只係去到影下相, 到此一遊我就心足...... (因為朋友係有錢人, 佢雖然鐘意韓星, 但係你叫佢等, 佢就耍手兼擰頭, 當然啦, 人地身嬌肉貴嘛......)
果朝早其實都有D雨架, 不過就冇之前果日咁大......
一出合井站, 我跟住網上教的路線行, 朋友因為見落雨, 又見要行15-20分鐘, 即刻"yap"部的士埋黎...... (冇計啦, 人地係有錢太太, 一見落雨當然唔想行啦, 但其實當時雖然要擔遮, 但唔係好大雨架咋......)
好彩我有韓文地址, 點知個的士司機好似睇唔明咁, 佢就篤車果部GPS, 但篤完之後又好似睇唔明, 係咁"R"哂頭!!! 我地當然唔落車啦, 跟住佢個樣唔知點咁, 做個兜圈的手勢俾我睇, 仲講句韓文, 我都唔知佢講乜!!! 不過佢都照車我地去......
原來好快就到, 仲冇跳表添, 2400 won! 咁唔怪得佢指手劃腳啦, 睇黎嫌呢枝係"細旗"唔想車我地......
到咗啦!!! 我地去到時都10am左右, 但都見到有1, 2個fans喺度等 (唔知等邊個啦~~~)
我地落車時, D雨已經好細, 得一DD雨粉, 所以唔使再擔遮啦!!! 其實老楊唔知點解會揀喺呢度開事務所, 因為附近係住宅區, 都幾靜下, 感覺好似舊區, 而且人又唔多個咁......附近有間GS25!
當時有架車駛入去, 朋友叫我睇下係咪BIGBANG? 我話應該唔會啦, 佢地邊有咁早起身吖? 不過我都離遠走去睇下, 係有人落車, 不過唔知邊個黎啦, 應該係工作人員都未定......
走時我地唔搭的士, 慢慢行番去地鐵站, 附近有間海苔展示館, 另外經過時見到有2間酒店, 其中一間叫hotel circle, 同埋2個SK加油站! 其實慢慢行都大約15分鐘度, 都唔算遠, 比較易搵! (當然我手上有地圖就比較好, 可以跟住黎行)
之後我地去弘大的Hello Kitty Cafe.
雖然有地圖喺手, 但去搵時條路線都好迂迴下, 左兜右兜先搵到, 原來佢起喺半山上面!!! 除咗我地之外, 仲有幾個泰國人黎到, 間cafe係就係開咗門, 但係仲執緊野, 我地等佢的同時, 亦影下相......
佢門口寫住開11點, 但喺我地同泰國人影影下相的時候, 有個女仔用D唔係好耐煩的聲線同樣貌, 同我地講11:30am先開, 仲叫我地唔好再企喺度, 咁冇計啦, 咁我地同泰國人咪走囉......
其實我地都係食完早餐冇耐, 咁咪唯有去下一站 - Trick Eye Museum.
其實我地都係食完早餐冇耐, 咁咪唯有去下一站 - Trick Eye Museum.
沒有留言:
張貼留言
注意：只有此網誌的成員可以留言。